Kartuisers

Die Kartuisers, ook bekend as die Orde van die Kartuisers (Latyn: Ordo Cartusiensis), is 'n geslote religieuse orde van die Rooms-Katolieke Kerk. Die orde is in 1084 op die been gebring deur Bruno van Keulen en sluit beide monnike en nonne in. Die orde beskik oor sy eie reëls, wat bekendstaan as die Statutes. Die leuse van die Kartuisers is Stat crux dum volvitur orbis, welke Latyn is vir "Terwyl die wêreld draai, staan die Kruis."^[1]

Die naam Kartuiser is afkomstig van die Chartreuse-berge in die Franse Voor-Alpe: Sint Bruno het sy eerste klooster gebou in 'n vallei in dié berge. Die naam is aangepas om die Engelse woord charterhouse te vorm, dit wil sê 'n Kartuisiese klooster.^[2] Vandag is daar steeds kartuisiese kloosters; 18 vir monnike en 5 vir nonne. Die alkoholiese drankie Chartreuse word sedert 1737 deur die monnike van Grande Chartreuse geproduseer, welke aanleding gegee het tot die naam van die kleur.

1. ↑ Renault, Marion (17 Desember 2020). "An Elixir From the French Alps, Frozen in Time". The New York Times (in Engels (VSA)). ISSN 0362-4331. Besoek op 7 Januarie 2021.
2. ↑ In Nederlands staan die kloosters bekend as Kartuize; in Frans as Chartreuse; in Duits as Kartause; in Italiaans as Certosa;in Pools as Kartuzja en in Spaans as Cartuja